Maré de reacçons contra a consulta sobre o uso do galego no ensino

Os principais agentes sociais e políticos do país, contrários à medida da Conselharia da Educaçom

Terça, 16 Junho 2009  PGL -

O Partido Popular (PP) está cada vez mais só na sua pretensom de consultar pais e maes sobre a língua na qual querem escolarizar as suas filhas e filhos. Nos últimos dias, os principais agentes sociais e políticos exibírom umha rotunda rejeiçom à iniciativa. O Bloco Nacionalista Galego e a sua organizaçom juvenil, Galiza Nova, consideram que estamos perante umha «consulta-armadilha» que, quer na forma, quer no fundo, é «inaceitável». Denunciam que o inquérito apenas pretende dar umha «coarctada» à Junta «para justificar umha política tracejada já de antemao». O partido independentista NÓS-Unidade Popular (NÓS-UP) emitiu um comunicado no que denunciam umha estratégia «mui grave que quer torpedear os escassíssimos avanços da nossa língua no ensino e abrir caminho à sua completa espanholizaçom» por parte da Junta. Da Direcçom Nacional do partido, salientam o facto de estarmos «diante de um caso insólito de consulta no ámbito educativo, que sintomaticamente tem como objectivo tombar um avanço democrático tam fundamental como o direito do nosso povo à língua própria». Do PSOE qualificam de «enganoso» o inquérito da Junta, e criticam a sua falta de rigor científico e sociolingüístico. Por isso, pedem um «novo consenso» entre as forças políticas, sindicais e equipas de normalizaçom lingüística. Desconhecida unidade Num gesto insólito, as principais organizaçons do ensino nom universitário galego assinárom um escrito unitário [PDF]. Nele, CIG, CCOO, CSI-CSIF, UGT, STEG, CAE, ASP-PG, Nova Escola Galega, Associaçom de Directores e Directivos de IES de Galiza, Coordenadora de Equipas de Normalizaçom Lingüística de Ferrolterra, Coordenadora Galega de Equipoas de Normalizaçom e Dinamizaçom Lingüística e a Mesa pola Normalizaçom denunciam que se trata de umha consulta «desenhada à margem da comunidade educativa», «carente de rigor na metodologia de distribuiçom dos inquéritos e no processamento de dados». Estas organizaçons lembram que o Decreto 124/2007 que o PP quer derrogar parte directamente do Plano Geral de Normalizaçom da Língua Galega, aprovado por unanimidade no Parlamento em 2004 (também, pois, com os votos favoráveis do PP). Por último, lembram que para garantir um domínio similar de galego e castelhano por parte do alunado, no inquérito distribuído pola Conselharia os pais e maes deveriam marcar «em galego» ou «tudo em galego», já de outra forma, ao seu ver, essas competências similares nom se garantiriam, devido à situaçom sociolingüística do país. CIG e STEG, dous dos sindicatos assinantes, já anunciárom acçons judiciais contra a Junta por este inquérito.

.

http://www.pglingua.org/index.php?option=com_content&view=article&id=938:mare-de-reaccons-contra-a-consulta-sobre-o-uso-do-galego-no-ensino&catid=2:informante&Itemid=74